Málsvarar erfðatækninnar fullyrða að ekki sé munur á erfðabreyttum matvælum og venjulegum matvælum og að af þeim fyrrnefndu stafi því engu meiri heilsufars-áhætta. Er hægt að færa sönnur á þá staðhæfingu?
Erfðabreytt matvæli eru afurðir erfðatækni sem breytir matjurtum með því að splæsa í þær genum úr framandi tegundum (bakteríum, vírusum, óskyldum matjurtum eða jurtum sem ekki eru notaðar til matar, skordýrum, búfé, fiski eða jafnvel mönnum) í þeim tilgangi að breyta eiginleikum þeirra. Venjulegar matjurtir eru afurðir náttúrulegrar æxlunar sem ekki verður milli ólíkra tegunda.
Þar sem erfðabreytt matvæli innihalda gen sem ekki er að finna í venjulegum matvælum er ekki hægt að halda því fram að þau séu eins, og því síður er hægt að gefa sér fyrirfram að áhrif þeirra á heilsufar séu sambærileg. (Sjá ERFÐABREYTT MATVÆLI)
